Ced Ride
	For di mucha e la purba na realisá su soño, esta di komuniká ku mundu pa medio di kanto. Su papa tabata bisé: "Mi yu, siña papia bo idioma bon i konosé esensia di palabra, i lo bo mira". Ku esaki komo estimulo el a oumentá ku medionan koriente su kuriosidat pa dediká su bida na nos komunikashon sosial. Curriculum Vitae Tumbanan Anual

---

Curriculum Vitae

1960	E ta kuminsá tuma lès di muzik básiko seka Ewald Chocolaad guitara ku solfeo i asina ta inisiá su karera komo kantante den esaki su agrupashon músikal "Cyclones del Ritmo". Den e agrupashon aki e ta siña kanta e basenan pa bolero, guaracha, galipso, wals, tumba, son montuno, balada. Ewald riba guitara lit, John Schermer kuarta, Hector Gressman guitara i kantante, Freddy A Kushina Clementina repicadoras, Luis Statia bongo, Sonny Samson kantante, Sonny Seferina piano, Hubert Wix guitara kantante.
1961	E ta forma parti di Conjunto Sonora Antillana bou di direkshon di Walter Istatia. Komo guarachero o sea e kantante pa e tipo di piesanan purá, e mester a kanta den e sekshon di kantantenan di e agrupashon aki entre ká Sonny Samson, Roland Pieternelle, ku Hector Gressman. Direkshon músikal Eddie "dòbelduim" Joseph bas, Arquiles Shon Ki Rosales riba bateria-timbales, Roland Monte repicadora, Sonny Seferina piano, Onor Williams, Alfred Aalse, Amacio i Altoisio ATichi riba tròmpètnan.
1966	E ta djòin Niño Sampson (èks pianista di Estrellas del Caribe) & Combo. Huntu ku Chitu Bòrgschot, “Ben” Benjamin, Cai Sillie, “Wòtty” Delannoy, Siegfried Hart, Roy Alexander, Anthony Pieter, Hamilton Subaran, Nel Farries, “Gèin” Sillé.
1967	Ritmo di bolero tabata promé grabashon den su karera artistiko, kompañá pa e mihó banda musikal eksistente riba su isla Curaçao yamá A Estrellas del Caribe. Un di e kansionnan ku mas a resaltá i tabata di e kompositor defuntu A. Thomasa titulá ANever say Goodbye.
1969	E artista ta gana e premio kultural PRODEKA "tambu di oro", komo kompositor di su éksito inmortal "Navidad sin Padre", dediká na su papa den gloria eterno. Awendía ta un di e kansionnan mas solisitá i mas zoná den temporada di Pasku di Nasementu pa mas ku 30 aña. Den e mesun aña aki, e ta risibí di e profesor Bill Smith lès pa uso di esena i tambe pa aksentuá su imagen komo persona. Esaki e la hasié ku e solo obhetivo pa por a partisipá komo un di e personahenan estelar durante di e apertura di teater nashonal di Kòrsou, Sentro Pro Arte. E forma ku e maestro Bill Smith a husa pa dirigié, a duna e fórmula perfekto ku Ced Ride a sá di husa durante e 38 añanan ku a pasa.
1971	E ta graba ku e orkesta di e astro argentino internashonal, den felis memoria, Jorge Daltos, su di dos LP titulá "Curacao, a Window to the World" (Un bentana habrí pa Mundu). Esaki ta un produkshon ku ta kontené piesanan tantu lokal komo internashonal.
1973	Interpretando e kansión titulá "Please, let the music play" di e kompositor hulandés Herman Wegewijs, e artista a gana premio pa "mihó bos" den e di dos "Festival Internacional de la Canción" na Puerto Rico. Den e festival aki 79 representante di rònt mundu a partisipá. Histórikamente, te aínda esaki ta e último festival ku tabatin asina tantu partisipashon di representantenan internashonal. Hende lo por a pensa, ku teniendo un yabi asina fuerte den su man, e artista lo por habri porta di mundu i ku e lo por a sigi kosechá méritonan, lo ke tabata garantía pa un éksito total den su karera artístiko. Sinembargo esei no tabata un motivo fuerte pa pone a artista "kue shelu tene ku man".Su amor patriótiko, su orguyo i balor propio, kualidatnan ku e l heredá di su defuntu tata, a hasi di Ced Ride (nomber original di e artista), komprometé su mes pa kumpli. E karakterístikanan aki a pisa mas tantu ku su gloria meresí den farándula internashonal. E artista tabatin konvikshon grandi i hopi sentido di balor pa su patrimonio kultural. Ced Ride a mira importansha di konsientisashon pa su idioma Papiamentu i e ta kuminsá un historial di bida, skirbiendo poesía i kansionnan nashonalista pa desaroyo kultural di su pueblo. Husando su idioma materno, e la skirbi diferente obra teatral i novela pa telebishon. Despues, pa e por a haña mas konsenshi i konosimentu di historia outéntiko di Caribe, Ced Ride a radiká na Sto. Domingo, kapital di Repúblika Dominicana. Durante un temporada largu e la traha ku e orkesta renombrá di e famoso direktor i konosido pianista Michael Camilo. Maestro Jorge Taveras a kompañá Ced Ride den diferente gira. E la realisá diferente grabashon ku maestronan manera Jorge Taveras i Bienvenido Bustamante. Komo artista eksklusivo di "Nosotros S.A.", e la forma parti di produkshon di un show a diario ku por a apresiá tantu via medionan di komunikashon manera radio komo telebishon yamá: "Nosotros a las Ocho", bou di direkshon di Freddy Beras Goico. Na Italia el a hasi grabashonnan ku Astor Piazolla, Agusto Martelli, Arnaldo Ciato bou di kordinashon i produkshon di Aldo Pagani. No a dura mashá ku Ced a yena un bashí den merkado musikal kultural di su isla natal Kòrsou, i a duna asina komienso na un siklo di estilo nobo i mashá original ku interpretashon di kansion na papiamentu.
1978	Den e produkshon italiano di Aldo Pagani e la presentá "Mi no ke bo mas" ,"Non ti voglio piu", "No te quiero mas" na spañó, tema musikal ku a sirbi na e mesun momentu komo su tesis, pa logra un puestu haltu riba eskala di komposishon na papiamentu.
1979	E artista ta bolbe teater pa kompetí den e di diesún "Festival Internacional de Actores y Drama" ku a tuma lugá na Aruba. Na e okashon aki Ced Ride ta keda premiá komo e "mihó aktor" di e enkuentro artístiko. Despues di algun tempu e la kuminsá dediká tempu na skirbi i tradusí obranan original pa teater i telebishion ku resultado masha éksitoso.
1981	Un meresido premiashon a kai pé komo "finalista de Oro" den e festival "Canción Folclórica Meditour" di Portugal, pa e letra di su kansión na papiamentu titulá "Pekador".
1986	Den e aña aki e la dirigí i produsí AFestival di Añanan 50", ku tabatin un durashon di sinku dia tra=i otro. Tabatin un re-enkuentro ku músikonan i artistanan di añanan 30,40 i 50, tur ko-patriota, kende a disidí di emigrá pa un bida nobo na Hulanda, New York, República Dominicana, Venezuela, Aruba, Boneiru i Kòrsou. E meta prinsipal di e produkshon aki tabata pa hasi un investigashon i rekopilá dokumentashon di historia musikal i kultural di protagonistanan di e islanan. E enkuentro di artista aki a konta tambe ku partisipashon di Celia Cruz i Daniel Santos.
1990	Durante shete dia largu, e artista a partisipá na un festival "30 Aña di Farándula", ku a bira un enkuentro musikal di artistanan i músikonan di añanan 60,70 i 80, ku por sierto a komplementá e trabou inisiá na aña 1986: un historia di shete dékada tokante artista, muzik i farándula. Ced Ride a sigi skirbi, indagá, komponé, analisá i mehorando asina su propósito final: krea kanto na papiamentu.
1992	For di un kolekshon grandi di varios eskritor famoso i poetanan lokal, e la kompilá un total di 14 poema, ku a resultá den un komposishon musikal ku ta karga e nòmber di "Poeta Kanta", den kuá e la husa ritmonan folklóriko manera tambú, mazurka, dansa, wals i seú. E proyekto aki e la dediké na hubentut, husando e filosofía ku Asi nos mes, artistanan i músiko intelektual, no duna hubentut i mundu un base fuerte pa balornan di moral, di tradishon i kre-ensia den nos mes kustumbernan, ken ta esun ku lo ofresé nos e speransa ei?
1997	"Biña mas Bieu, mas Bon", su di dos disko kompakto ta sali riba merkado, ku un kantidat di tema ku ta emití desaroyo kultural, i ku ta proyektá un antología (deskripshon detayá) di su bida musikal, komo kantante, eskritor i kompositor. Di e forma aki su kansión "Biña mas Bieu mas Bon" ta haña un balor agregá pa su kontenido real i outéntiko.
1999	Su disko kompakto "Ta Yu di Kòrsou mi ta", ta sali riba merkado, i ta kibra tur silensio pa konvertí Ced Ride di e forma aki, den e òutor intelektual na Kòrsou di Kanto na Papiamentu. Ta un manera pa kaba di definí i reafirmá su ponensia, ku konstantemente e ta prediká "ta Yu di Kòrsou mi tá". Anto tur esaki ta sosedé hustamente na momentu di konmemorashon di 500 aña historia skirbí di Kòrsou. Su estilo di kanto , komposishon i kòmbersashon líriko den su idioma natal, ademas di e herensia kultural ku ta resaltá den su obranan, ta otorgá na e artista aki e titulo absoluto di eskritor, kompositor, kantante i produktor di e último siglo aki Awendía, ku masha orguyo i satisfakshon, e ta konta ku un kantidat grandi i variá di komposishon na idiomanan tantu spañó komo inglés den su reportorio. Sin embargo ta e profundisashon den un kantidat grandi di temanan mashá bunita ta seya su éksito. Hopi di e temanan aki, ta produkto di influensia Afro-karibense den su idioma papiamentu, ku lo sirbi mundu henter pa komprondé mas di su isla natal i su idioma. E struktura pa komprenshon fásil, a pone ku e artista a konotá su mes komo un simpel kompositor i kantante pa sirbi humanidat den un milenio nobo. Entre e personan ku tabatin mas influensha den su karera artístiko i ku definitivamente a determiná un bida di kosecha meritorio pa Ced Ride ta: Victor Paz, Jorge Taveras, Anthony Robbins, Rogelio Martinez Furé, Mahatma Ghandi, Paul Brenneker, Elis Juliana i finalmente Luis Daal. Nan inspirashon filosófiko doktriná, nan personifikashon i nan influensha fenomenal a aportá en grande na desaroyo di kanto, konsiensia i konvivensia kultural di Ced Ride. Su profundisashon pa komunikashon sosial ta e produkto final di un historia impreshonante di simbología ku ta pertenesé na e artista aki. Dia 22 di yüni 1999, preparando pa drenta un milenio nobo, Gezaghebber di Kòrsou, komo representante di pueblo, a hasi entrega na Ced Ride, di un distinshon pa ekselensia. Ced Ride ta risibí e premio meritorio COLA DEBROT, un rekonosimentu honorífiko kultural nashonal. Den e último luna di siglo 20, 30-12-00, Ced Ride un biaha mas ta laga su obranan resoná den un sala yen, pa historia di rekòrt, den e teater nashonal S.P.A.. Durante su konsierto di milenio titulá "Ced pa Semper", su bos i kanto, ademas di su komposishonnan interpretá pa un variedat di otro artista, ta bolbe aksentuá resultado di un karera artístiko impreshonante.

---

Tumbanan Anual

AÑA	Komposishon	Kompositor	Kantante	Grupo Musikal	Areglista
1971	Antifaz	Ced Ride	Ride, Ced	Propio Combo
1977	Skine Hanchi	Ced Ride	Ride, Sigmund		Ride,C
1978	Tumba Loko	Ced Ride	Ride, Sigmund		Ride,C
1982	Shi Maria	Ced Ride	Ride, Ced	Enos	Scharbaai,R.
1984	Bip,bip,pe na bo mas	Ced Ride	Ride, Ced	Doble R SSS	Recordino,R.
1985	No Kenya	Ced Ride	Ride, Ced	Doble R SSS	Recordino,R.
1987	Hari	Ced Ride	Ride, Ced	Doble R SSS	Recordino,R.
1988	Ta koi tur hende	Ced Ride	Ride, Ced	Doble R SSS	Recordino,R
1989	Impresionante	Ced Ride		Doble R SSS
1990	Basha bala ban vota	Ride/ Heerenveen	Cruz,Gabrielo		Mendez,L.
1990	Koncha ku su sapatia	Ced Ride	Ride, Ced	Agrupashon "90"	Mendez,L.
1997	Den Kòrsou tin un P	Ced Ride	Ride, Ced	E.R.A.	Mambre,K.
1998	Saro 130 komunikashon universal	Ced Ride	Ramos,Moises		Dopwell,Angelo
1998	Tumba di salon	Ced Ride	Leito,Rudsel		Dopwell,Angelo
1999	Mira nan, mira nos	Ced Ride	Ride, Ced	E.R.A.	Rosario,H/Martinez,J.
2000	Djaki mi ta	Ced Ride	Lourens,Farley		Rosario,H/Gregorio,U.
2000	No me ku no me	Ced Ride	Ride, Ced	E.R.A.	Rosario,H/Gregorio,U.
2002	Wak bo kaya Kòrsou	Ced Ride	Ced Ride	Chispa
2002	Na Cesar di Cesar	Ced Ride	Libiee,Albertico
2002	Un basilòn	Ced Ride	Frans,Jill
2003	Pa nos Krese	Ced Ride	Ced Ride	Chispa	Antoin, Ravelo